寵物店隨想 (一)

屋企樓下唔聲唔聲開咗間寵物店. 感覺又喜又驚.
喜者突然要幫 Niza 買嘢就方便咗. 驚者唔知點解直覺佢好難做得耐.

忽然記起 Marketing 的所謂 4P: Price, Product, Place and Promotion.
諗一諗, 覺得間舖難做得耐係佢 4P 都有啲問題. 尤其係 Place.

點解咁講呢?
想像我屋企附近地區好似個"目"字咁, 上中下分三大部份, 上面主要係居屋同公屋, 中間係地鐵上蓋一個唔俾養狗嘅屋苑, 最下面就係我屋企, 一個俾養狗嘅屋苑.
我家屋苑住户通常都會由地鐵上蓋嗰面行天橋由屋苑平台出入. 如果由天橋去間寵物店係須要 Do 住戶証, 入咗屋苑平台, 仲要落一層到地下先得. 如果唔行天橋, 由地鐵站出口行過去就要過一條馬路, 再行兩分鐘左右, 但係全程無蓋同無嘢睇嘅.
個寵物店所處嘅屋苑商場只有幾間舖: 地產, 診所, 乾洗同美容.
都有住户由地下商場進入屋苑, 好似啲學生上落校車前後咁, 但相對人數甚少.


幾個考慮:
I. 目標群size問題



我家屋苑大概有5,600户左右, 假設10%養貓狗, 目標群只有560户左右.
大膽估30%會喺間鋪買嘢, 平均一户三個月會買$150左右嘢,
一個月營業額只有 560x30%x$150/3 = $8,400


地鐵上蓋屋苑相若. 當公屋居屋亦相若, 總數11,200户, 3%偷養便再加336户左右.


但係呢336户目標群有幾多會喺呢間寵物店買嘢呢?


II. 人流問題
簡單咁講, 如果唔係真係要買嘢, 基本上唔係太多人會經過間鋪.
III. 競爭對手
寵物店主要賺錢嘅應該係貓狗糧, 但係地鐵上蓋同公屋嗰邊嘅超市都有啲大牌子嘅糧賣. 另外我無统計但覺得大多數寵物主人都比較喜歡係外面例如旺角買寵物嘢
IV. 租金
私人屋苑租金相對較高, 成本難減輕

有無辦法?
宜家最重要係增加目標群size同人流. 即係點樣能引到區外客呢?
難, 除非有啲好獨特嘅 Product, 或者特別平嘅價錢.
誇啲嘅話, 令到成個場都賣寵物嘢, 加埋VET, grooming, training 等等等等,
最好游說隣近區域舖頭過埋嚟.將個場攪成為區域性寵物中心就有得諗.

戰場上最好立於不敗之地, 商場最好立於不蝕之地.
Place 出現問題已經輸咗一半. 因為競爭太大Price難有位走.
唯有睇吓 Product 同 Promotion有冇得扭轉敗局而已.