充實嘅一日

星期日三連發!
Niza 連去九龍仔狗公園, Good Dog Cafe 同尖沙咀海傍!
仲有得同番茄, 奶茶, 麥皮, MoMo齊齊玩!
Niza 開心到屎! 放哂電返到屋企就好瞓到屎!

Niza爸:  Niza 睇相囉 ?
Niza:     老豆唔好攪我住啦.....

算啦, 唔好埋 Niza 啦, 睇吓啲相先....

喺九龍仔狗公園....

MoMo: 奶茶, 玩打交囉 !
Niza: 咪住, 等我食哂啲樹葉清咗個場先 !
番茄: (心諗) 你哋唔好攪我呀, 我要扮 Cool 架....
奶茶: 麥皮呢 ?
麥皮: 我都未瞓醒, 啋你哋都儍 !

喺 Good Dog Cafe....

嘩 ! 幾靚.......個兜.
嗰度仲有好多嘢玩架....

Niza, MoMo: 咦 ! 個檸檬呢 ?

喺尖沙咀呢?....
無相? Er....唔係, 不過唔係好見得人喎.....
 

Niza: 乜嘢叫鬆郁矇呀吓 ?

奶茶: 嘩! 啲閃燈好殘眼呀 !

Niza爸: 呢張得呱 ?
Niza:     吓 ! 影到我咁肥 !

唉! 所以呢, 影啲仔仔女女真係要單鏡機先似樣嘅.

如是者 Karaok, 宵夜, 飲嘢直落玩到凌晨三點幾無哂人先返屋企....

Oh! Sorry 記錯咗第日....應該係去完海傍十點倒就返屋企 lu.
Karaok, 宵夜, 飲嘢下次先啦

大禮物 !

Niza: 尋曰瞓瞓吓無端有人送貨, 攪到我醒哂, 送乜鬼呢 ?

嘩 ! 好大呀嗰盒 ! 到底係乜呢 ?

嘩 !...嘩 !.....嘩 !........嘩 !

Niza 媽: 全部都係俾 Niza 架, 開唔開心呀 ?
Niza:      吓 ! 我....我......開心到飛起呀 !!! 多謝媽咪 !

Niza 爸: 唉 ! 縱壞哂.....

奇怪嘅睡相

大家睇吓下面張相,
有無發覺有乜共通點呢 ?

無錯啦 ! Niza 瞓覺嗰時好鍾意伸高對腳架.
Niza 媽話係學咗佢喎, 咁樣無咁易靜脈曲張架.
(係真唔係呀?)

其他狗狗會唔會都鍾意咁瞓嘅呢 ?

碼頭一個

知唔知呢度係邊度呢 ?

熟口熟面係咪 ? 係呀, 真係嗰度呀, 咪西貢碼頭囉.
原來西貢碼頭啲水可以清到見底架 !

呢日其實瞓得唔係幾好, 晨早五點就醒咗, 又瞓唔噃.
於是咪一早捉 Niza 去西貢晨運囉.
行吓行吓, 食個早餐, 又 Hea 吓 Hea 吓去咗碼頭睇吓魚仔.
睇吓睇吓嚇然發現啲水竟然清到見底.
真係奇境呀 ! 幾乎以為自己唔喺香港 !

原來同一個地方, 唔同時間去會有咁大分別嗰禾.
有時真係要無厘頭放自己假去 Take 個 Break,
好好睇清楚 Office 以外嘅世界.

似貓嘅狗遇上似狗嘅貓....

尋日同 Niza 番咗爺爺屋企玩.
爺爺屋企有隻俾人話似狗嘅貓叫小寶架.
Niza 就成日俾人話啲動作似貓.
今次真係似貓嘅狗遇上似狗嘅貓 la.

佢哋碰面會唔會即刻 friend 過打 Band 呢?

Niza: (呆一呆).......
小寶: (都係呆一呆)......
Niza: (即刻貓上身, 企咗起身) 嚟玩吖, 嚟玩吖...
小寶: (突然變咗狗上身) Wu.....Wu.....你咪埋嚟呀, 你試吓埋嚟.....
Niza: 嚟玩吖, 嚟玩吖...
小寶: (個身弓起哂) Wu....Wu....你咪埋嚟呀, 你試吓埋嚟, 仲埋嚟吖嗱...
Niza: 嚟玩吖, 嚟玩吖...

小寶: (變番貓企起身叫) 叫你唔好埋嚟你係唔聽...等我出手你就知 !
Niza: 嚟玩吖, 嚟玩吖...
小寶: 好 ! ......
Niza:  嘩 !....... 




點解 Niza 當場嘩嘩聲呢 ?
原來說時遲那時快, 小寶一起手, 一招扭左走右,
飛奔咗入房, 再飛上書枱, 再飛咗去上格床.
Niza 睇怕呢世都做唔到咁高難度嘅動作, 唯有嘩嘩聲表示驚嘆囉.
可惜小寶跟住成晚都唔落番嚟,
唔係可以教 Niza 一招兩式嘛. 

膝關節異位...檢查結果

先多謝大家關心.
尋日因為醫生有急診所以改今日檢查.
結果係暫時先觀察一個月, 若果再有彈弓腳情形就可考慮做手術.

醫生話係三級, 但係 Niza 無異常情況, 唔見有痛或者行動唔正常.
有時一次半次彈弓脚, 情況唔算係太差. 有啲狗狗可能四, 五歲先會有第二次.
醫生例牌都係話游吓水等啲肌肉强一啲.
..........但係天氣開始凉, 唔知邊樹有暖水池俾狗狗呢?

依家亦有食葡萄糖安, 等啲軟骨保養得好啲.

暫時係咁樣. 睇吓呢個月點先.

膝關節異位

要嚟嘅終於都係要嚟.
Niza 嘅右膝關節異位似乎已經達到第三級.
做手術睇嚟都係避唔到囉.
聽日會睇醫生睇吓情況點樣.

雖然有啲唔開心, 不過阿Ｑ咁諗
唔係兩隻脚都有事, 都算係不幸中之大幸囉.

膝關節異位係乜嚟嘅呢 ?
下面個 site 有啲幾詳細嘅資料可以参考吓:
http://www.famousvet.com/class_09.htm

呢個問題小型狗都幾普遍.
如果考慮養小型狗, 記緊要 check 埋呢樣嘢.

豪宅樓下公園...我來也!

Niza: 星期六去開姨姨屋企, 當然要順便去埋佢樓下個公園啦.
我屋企樓下個公園都算大啦, 點知呢個公園呀...大到無倫呀,
又有大草地, 又有大水池, 重有勁大嘅樹....超多朋友仔係度玩呀.
一見到咁嘅環境, 梗係笑到見牙唔見眼啦.

豪宅即係豪宅, 樓下個公園居然都有個名嘅喎 !
好似叫......員工福彭......
..........
.....
呀, 唔係, 係彭福公園至真.

但係點解我要好似啲馬仔朋友咁上哂繩, 唔俾我自由行嘅?

老豆: 因為你攪到阿媽無咗啲肉囉 !
Niza:  吓, 我無咬阿媽好耐啦喎.
老豆: 放一陣咋, 你就走咗去又爬石, 又潛水, 又同我哋玩捉"依因"...
嚇到阿媽鼻哥窿都無肉呀 !

豪宅啊 !

Niza: 上星期六去咗姨姨屋企, 嘩, 豪宅嚟架.

睇吓個門口....嘩! 幾大 ! 睇唔睇到我呀 ?!

入到去當然更正啦, 重有個勁靚露台呀 ! 睇吓個靚景 !

阿媽驚我開心到飛咗落街, 唔俾我出露台呀 !

Niza媽: 衰女咁鐘意呢度, 阿媽買個單位俾你囉?
Niza:     真嘅? 你睇唔睇到我眼入面嘅光茫呀 !

老豆: Niza你就想 ! 依家啲樓唔係俾香港人買架, 諗吓好啦 !
Niza:  咁香港狗呢?
老豆:  ....或者得噃....因為依家喺香港真係做狗好過做人呀 !