見牙唔見眼

Niza: EE送嘅 "人間美食" 有幾好味?
食到我咁樣咪叫見牙唔見眼囉.

12月24日

Niza: 聖誕去咗北海道睇花花呀! 正!

不過唔係 2009 年....要等北海道無冬天先.

咁我聖誕去咗邊呢? 睇吓估唔估到?

雖然遲咗啲,
祝大家 Merry X'mas and Happy New Year 2010 !!!

Happy嘅一日!

Niza: 上星期日又去邊呢? 點解咁 Happy?
睇吓呢樹綠色嘅地, 就知道係無狗不識嘅彭福公園啦 !
見唔見我同番茄急不及待嘅背形呀....

去到真係各有精釆呀!
茶煲仔: 我知我係好形, 奶茶生你唔駛追住我嚟聞嗰喎...

嘩! 麥皮呢日挑戰高難度呀! 為咗追住奶皮媽,
佢好勇敢咁跳過呢啲長過佢嘅渠呀!

番茄依然有好多嘢諗咁樣啦, 尤其着咗衫衫之後....

仲有小小白呀! 咦? 乜有個叫小小白嘅朋友仔咩?
哦! 原來係茄媽嘅新長炮! 嘩! 好有殺手 feel 呀!

 
咁我呢?
老豆唔俾我自由行呀......我咪同阿樹先生傾吓計咁囉.

樹(頭)先生: 呀......小姐, 我無做樹好耐囉....
Niza: .......

咁....又過咗一日......有乜咁 Happy 呢?
因為有茄媽送嘅 "人間美食" 吖嘛!
多謝茄媽EE

都係充實嘅一日 ! Yeah !

Niza: 又有街街去! 好嘢 !
但係呢樹邊度嚟架?

西貢獅子會自然教育中心呀!
Niza: 嘩! 呢度都幾大喎! 又有咁多草! 可以食餐飽啦! 

Niza爸: 乜話?! 你試吓吖哪 !
Niza:     Er.....講吓笑啫. 唔駛咁緊張喎 !

話時話, 嚟呢度玩都幾好噃, 一去到就見到好多車位.
行入去, 嘩! 雖然啲草地唔係話好大, 但就有好多塊.
我試哂啲草都要差不多成粒鐘呀!
唔鍾意食草嘅, 又可以行吓貝殼館同昆蟲館,
行到攰又可以去聰鳴茶館食個 tea.
臨走仲可以買啲有機草..菜番屋企食呢!
俾幾多分? 睇我個樣就知啦! 我俾足十個正呀!

 
玩完落西貢碼頭都係十分鐘車倒,
嗰度又係狗狗樂園嚟, 見到好多狗朋友呀,
行到尾仲有個沙灘行添. 如果唔係天氣涼,
游埋水都仲得呀!

最後喺西貢食埋海鮮呀.....我想.
老豆話得兩人一狗, 食唔倒乜喎.
下次我要叫哂啲 EE, Uncle, 呢個嗰個一齊嚟食餐勁至得 !

今日又係充實嘅一日.......有埋海鮮食就 perfect 啦 !

Niza爸: 唉! 呢啲咪得寸進尺囉

又係充實嘅一日

Niza: 上星期六又有街街去 ! Yeah !

同番茄坐車車, 睇風景, 我有帶安全帶架 ! 幾乖 !

去到錦田跑大草地 ! 幾大 ! 幾正 ! Yeah Yeah !

咦 ? 點解有啲狗仔.....隊嘅 ?
睇真啲, 原來係茄媽哋. 嘩! 好 Prof, 好形吓喎.....

老豆下次都帶大機啦 ! 唔駛又影到我鬼咁肥....

Niza 爸: 仲好講, 你好似奶皮哋咁乖就話啫, 追你都追到我屎屎吓啦 !
Niza: 哦 ! 收到 ! 咁我誠意邀請奶皮媽帶啦下次.

去完錦田再去屯門燒嘢食同慶祝 小 Qoo 生日.

好開心呀 ! 識咗好多新朋支呀 !
好似 小 Qoo 一家啦, Nano啦, 朦豬豬啦....

玩完仲有好味嘅蛋糕同小Qoo 媽送嘅好好味嘅肉乾食 !
Yeah Yeah Yeah !

Niza 爸: 吓! 仲話减肥 ?

充實嘅一日

星期日三連發!
Niza 連去九龍仔狗公園, Good Dog Cafe 同尖沙咀海傍!
仲有得同番茄, 奶茶, 麥皮, MoMo齊齊玩!
Niza 開心到屎! 放哂電返到屋企就好瞓到屎!

Niza爸:  Niza 睇相囉 ?
Niza:     老豆唔好攪我住啦.....

算啦, 唔好埋 Niza 啦, 睇吓啲相先....

喺九龍仔狗公園....

MoMo: 奶茶, 玩打交囉 !
Niza: 咪住, 等我食哂啲樹葉清咗個場先 !
番茄: (心諗) 你哋唔好攪我呀, 我要扮 Cool 架....
奶茶: 麥皮呢 ?
麥皮: 我都未瞓醒, 啋你哋都儍 !

喺 Good Dog Cafe....

嘩 ! 幾靚.......個兜.
嗰度仲有好多嘢玩架....

Niza, MoMo: 咦 ! 個檸檬呢 ?

喺尖沙咀呢?....
無相? Er....唔係, 不過唔係好見得人喎.....
 

Niza: 乜嘢叫鬆郁矇呀吓 ?

奶茶: 嘩! 啲閃燈好殘眼呀 !

Niza爸: 呢張得呱 ?
Niza:     吓 ! 影到我咁肥 !

唉! 所以呢, 影啲仔仔女女真係要單鏡機先似樣嘅.

如是者 Karaok, 宵夜, 飲嘢直落玩到凌晨三點幾無哂人先返屋企....

Oh! Sorry 記錯咗第日....應該係去完海傍十點倒就返屋企 lu.
Karaok, 宵夜, 飲嘢下次先啦

大禮物 !

Niza: 尋曰瞓瞓吓無端有人送貨, 攪到我醒哂, 送乜鬼呢 ?

嘩 ! 好大呀嗰盒 ! 到底係乜呢 ?

嘩 !...嘩 !.....嘩 !........嘩 !

Niza 媽: 全部都係俾 Niza 架, 開唔開心呀 ?
Niza:      吓 ! 我....我......開心到飛起呀 !!! 多謝媽咪 !

Niza 爸: 唉 ! 縱壞哂.....

奇怪嘅睡相

大家睇吓下面張相,
有無發覺有乜共通點呢 ?

無錯啦 ! Niza 瞓覺嗰時好鍾意伸高對腳架.
Niza 媽話係學咗佢喎, 咁樣無咁易靜脈曲張架.
(係真唔係呀?)

其他狗狗會唔會都鍾意咁瞓嘅呢 ?

碼頭一個

知唔知呢度係邊度呢 ?

熟口熟面係咪 ? 係呀, 真係嗰度呀, 咪西貢碼頭囉.
原來西貢碼頭啲水可以清到見底架 !

呢日其實瞓得唔係幾好, 晨早五點就醒咗, 又瞓唔噃.
於是咪一早捉 Niza 去西貢晨運囉.
行吓行吓, 食個早餐, 又 Hea 吓 Hea 吓去咗碼頭睇吓魚仔.
睇吓睇吓嚇然發現啲水竟然清到見底.
真係奇境呀 ! 幾乎以為自己唔喺香港 !

原來同一個地方, 唔同時間去會有咁大分別嗰禾.
有時真係要無厘頭放自己假去 Take 個 Break,
好好睇清楚 Office 以外嘅世界.

似貓嘅狗遇上似狗嘅貓....

尋日同 Niza 番咗爺爺屋企玩.
爺爺屋企有隻俾人話似狗嘅貓叫小寶架.
Niza 就成日俾人話啲動作似貓.
今次真係似貓嘅狗遇上似狗嘅貓 la.

佢哋碰面會唔會即刻 friend 過打 Band 呢?

Niza: (呆一呆).......
小寶: (都係呆一呆)......
Niza: (即刻貓上身, 企咗起身) 嚟玩吖, 嚟玩吖...
小寶: (突然變咗狗上身) Wu.....Wu.....你咪埋嚟呀, 你試吓埋嚟.....
Niza: 嚟玩吖, 嚟玩吖...
小寶: (個身弓起哂) Wu....Wu....你咪埋嚟呀, 你試吓埋嚟, 仲埋嚟吖嗱...
Niza: 嚟玩吖, 嚟玩吖...

小寶: (變番貓企起身叫) 叫你唔好埋嚟你係唔聽...等我出手你就知 !
Niza: 嚟玩吖, 嚟玩吖...
小寶: 好 ! ......
Niza:  嘩 !....... 




點解 Niza 當場嘩嘩聲呢 ?
原來說時遲那時快, 小寶一起手, 一招扭左走右,
飛奔咗入房, 再飛上書枱, 再飛咗去上格床.
Niza 睇怕呢世都做唔到咁高難度嘅動作, 唯有嘩嘩聲表示驚嘆囉.
可惜小寶跟住成晚都唔落番嚟,
唔係可以教 Niza 一招兩式嘛. 

膝關節異位...檢查結果

先多謝大家關心.
尋日因為醫生有急診所以改今日檢查.
結果係暫時先觀察一個月, 若果再有彈弓腳情形就可考慮做手術.

醫生話係三級, 但係 Niza 無異常情況, 唔見有痛或者行動唔正常.
有時一次半次彈弓脚, 情況唔算係太差. 有啲狗狗可能四, 五歲先會有第二次.
醫生例牌都係話游吓水等啲肌肉强一啲.
..........但係天氣開始凉, 唔知邊樹有暖水池俾狗狗呢?

依家亦有食葡萄糖安, 等啲軟骨保養得好啲.

暫時係咁樣. 睇吓呢個月點先.

膝關節異位

要嚟嘅終於都係要嚟.
Niza 嘅右膝關節異位似乎已經達到第三級.
做手術睇嚟都係避唔到囉.
聽日會睇醫生睇吓情況點樣.

雖然有啲唔開心, 不過阿Ｑ咁諗
唔係兩隻脚都有事, 都算係不幸中之大幸囉.

膝關節異位係乜嚟嘅呢 ?
下面個 site 有啲幾詳細嘅資料可以参考吓:
http://www.famousvet.com/class_09.htm

呢個問題小型狗都幾普遍.
如果考慮養小型狗, 記緊要 check 埋呢樣嘢.